Bæjarráð leitar til íbúa Mosfellsbæjar um hjálp við fjárhagsáætlunargerð

Að mínu mati er mjög mikilvægt að leita til íbúa Mosfellsbæjar í leit að hagræðingu í rekstri bæjarfélagsins. 

Þessa dagana stendur yfir vinna við fjárhagsáætlunargerð fyrir næsta ár og er hverjum steini er velt við í leit að lækkun rekstrarkostnaðar því ekki viljum við þurfa að draga úr þjónustu frá því sem nú er. Staðreyndin er sú að tekjur Mosfellsbæjar hafa dregist saman líkt og annarra bæjarfélaga á landinu og því ljóst að rekstur verður erfiður á næstu árum. Árið í ár var okkur erfitt, en einsýnt er að næsta ár verður erfiðara.

Það er mín von að íbúar geti komið með eitthvað sem okkur hefur ekki dottið í hug sem gæti leitt gæti til lækkunar rekstrarkostnaðar til skemmri eða lengri tíma.

Ef fólk hefur slíkar hugmyndir eða tillögur er hægt að skrá þær hér og senda bæjaryfirvöldum. 

Bæjarráð mun fara yfir allar hugmyndir sem berast.

Athugasemdir

[Guðjón Sigþór Jensson, 22.11.2009 kl. 11:37]

Að stýra samfélaginu farsællega er ekki neitt sældarbrauð. Að láta tekjur duga fyrir útgjöldum er ekki alltaf létt verk. Stundum er talað um að það sé ekki auðvelt þegar vel árar, þá gleymist oft að leggja til hliðar vegna mögru áranna sem alltaf vilja fylgja á eftir uppgangstímum. Öðrum finnst kannski auðveldara að stjórna þegar illa árar, þá séu heimildir til niðurskurðar rýmri og þolmörkin víðari.

Við stöndum frammi fyrir því erfiða verkefni að tekjur til samneyslunnar hafa skroppið mjög illa saman. Sumir tekjustofnar hafa nánast gufað upp sem áður voru digrir. Má þar nefna fjármagnstekjuskattinn sem eru síðustu leifarnar af tíundunni gömlu, megintekjustofni samfélagsins fyrrum á miðöldum.

Sveitarfélögin hafa þurft að glíma við þá erfiðu þraut „að ná endum saman“ rétt eins og aðrir aðilar í samfélaginu. Einkum hefur rekstur skólanna verið mörgum sveitarfélögum verið sérstaklega erfiður enda aldursskipting íbúa þeim oft óhagstæður.

Það er mjög mikilsvert að opna íbúalýðræðið sem mest til að greiða götu vinsamlegri og uppbyggilegri samskipta. Oft hefur kjörnum fulltrúum í lýðræðisríkjum verið núið um nasir að þeir vilji koma sér fyrir í einhverjum „fílabeinsturnum“. Líklega er öllu skynsömu fólki ljósat að sjá tími er liðinn og vonandi kemur sá tími aldrei aftur.

Athygli vekur hve vakning meðal margra stjórnmálamanna bæði í sveitarstjórnum sem og í landsmálum er ljós sú vaxandi þörf að setja skynsamlegar siðareglur og starfa eftir þeim. Mér finnst vanta í sumar þessar reglur það sem mestu máli skiptir: að til að koma í veg fyrir hagsmunaárekstra þá megi kjörinn fulltrúi ekki eiga eða sitja í stjórn fyrirtækis sem kann að hafa hagsmuni öndverða við þá sem viðkomandi er kjörinn fyrir að gæta. Í mörgum löndum eins og Bandaríkjunum ber öllum frambjóðendum að losa sig við alla hagsmuni, t.d. ef þeir eiga hlutabréf í fyrirtæki að losa sig við þau í hendur á öðrum aðilum. Þetta mætti taka til skoðunar og hvort þarna sé ekki fyllsta ástæða að aðlaga okkar samfélagi að slíkum sjónarmiðum.

Allar góðar hugmyndir til að efla lýðræðið og bæta það er af því góða. Það ber að fagna framtaki þínu Herdís sem annarra góðra sveitarstjórnarmanna.

Gangi ykkur vel í ykkar góða praxís.

Mosi