Bloggfærslur mánaðarins, maí 2007

Lögreglan sýnilegri

motmaeli

Það eru hálf ömurlegar fréttir sem maður les að heiman, rán, líkamsárásir, fíkniefni, ölvun við akstur, en lögreglan virðist vera að standa sig vel við eftirlit og um allt land og er mun sýnilegri.

Hér í Kaupmannahöfn voru mótmæli í miðbænum gær. Þetta voru mest ungir krakkar sem voru að mótmæla og fylltist bærinn á örskotsstundu af lögreglumönnum. Það er ljóst að lögreglan hér í landi tekur enga áhættu þegar kemur til mótmæla eftir það sem gerðist við Ungdomshuset. Lögreglan var mjög sýnileg hérna í Kaupmannahöfn í gær og hefur líka verið það heima. Bæði á höfuðborgarsvæðinu og einnig á öðrum stöðum á landinu eftir breytingar á skipan lögreglumála í landinu. 

Ég er ég ekki í vafa um að sýnileiki skiptir miklu máli og einnig að upplýsa fólk um það sem gerist líkt og gert var í þessari frétt, en vítin eru svo sannarlega til að varast þau. 


mbl.is Lokkaður inn í húsasund og rændur
Tilkynna um óviðeigandi tengingu við frétt

Rigning rigning rigning

 

 

Í dag

 

Á morgun

 

Mánud.

K.höfn

17°/11° 16°/11° 18°/12°
Akureyri / / 10°/
Reykjavík / / /
New York 28°/23° 26°/23° 27°/23°
Egilsst. / / /
London 15°/12° 12°/ /

Ég hef oft sagt frá því að veðrið er sérstakt áhugamál hjá mér. Við hjónin ákváðum að skella okkur til kóngsins könben í frí og ákvað ég að skoða ekki veðurspá áður en við færum. En það rigndi í gær þegar við komum og líka í dag og því ákvað ég að skoða framtíðarspána á mbl. Veðurspáin hljóðar upp á rigningu, rigningu og svo rigningu. En karlinn fer svo heim á þriðjudaginn, en ég verð á neyðarvarnafundi fram að helgi og er ég full bjartsýni um að sólin muni eitthvað sýna sig. 

Þetta breytir í sjálfu sér ekki miklu fyrir okkur, nema kannski því að maður nennir ekki að fara í Tívolíið í rigningu. Við fórum til að mynda út að borða í dag, sannir Íslendingar og sátum undir regnhlíf með teppi eins og reykingarfólkið. Við fórum líka á Strikið og sáum Kaupmannahafnar karnivalið. Það var gaman að sjá en samt ekki eins mikið í þessi atriði lagt og áGay pride í Reykjavík, en þarna var mikið af dansatriðum. Það voru greinilega margir dansskólar sem tóku þátt og fullt af glöðum dönsurum sem sýndu margir hverjir góða takta. Þarna sáust fjölmargar konur í efnislitlum búningum í kuldanum og liggja þær líklega núna undir sæng með rautt nef, í ullarsokkum með fjallakakó.

Dansarar í karnivali í Köben      IMG_2129    IMG_2115

IMG_2137    IMG_2132    IMG_2150 

IMG_2157     IMG_2094    IMG_2154

Elli minn í Köben


Ný ríkisstjórn tekin við

428886A

Það var mikið um að vera á Bessastöðum í dag. Haldinn var síðasti ríkisráðsfundur fráfarandi ríkisstjórnar og lauk þar með farsælu 12 ára samstarfi Sjálfstæðisflokks og Framsóknar. Síðan var haldinn fyrsti fundur hinnar nýju ríkisstjórnar Sjálfstæðisflokks og Samfylkingar og tekur nokkurn tíma að venjast nýja munstrinu, en stjórnarsáttmálinn lofar góðu. Það var sérstakt að horfa á ráðherra Framsóknar mæta á sinn síðasta fund og klikkaði Guðni Ágústsson ekki á tilsvörum frekar en fyrri daginn og gekk út af fundinum óbeislaður og hnakklaus að eigin sögn.

Einn nýr ráðherra kemur inn fyrir Sjálfstæðisflokkinn eða Guðlaugur Þór Þórðarson, heilbrigðisráðherra. Sex nýir ráðherrar Samfylkingarinnar taka nú við embætti eða þau; Ingibjörg Sólrún Gísladóttir, utanríkisráðherra, Kristján Lúðvík Möller, samgönguráðherra, Jóhanna Sigurðardóttir, félagsmálaráðherra, Össur Skarphéðinsson, iðnaðarráðherra, Björgvin G. Sigurðsson, viðskiptaráðherra, og Þórunn Sveinbjarnardóttir, umhverfisráðherra. Fyrir eru í stjórn sem fyrr; Geir H. Haarde, forsætisráðherra, Þorgerður Katrín Gunnarsdóttir, menntamálaráðherra, Björn Bjarnason, dómsmálaráðherra, Árni M. Mathiesen, fjármálaráðherra og Einar Kristinn Guðfinnsson, sjávarútvegs- og landbúnaðarráðherra.


Nýtt fólk hefur tekið við lyklavöldum í sjö ráðuneytum og Jóhanna Sigurðardóttir komin aftur í félagsmálaráðuneytið eftir 13 ára hlé. Það verður mjög vel fylgst með störfum nýju ríkisstjórnarinnar næstu árin, enda vill fólkið í landinu eðlilega láta verkin tala. Stjórninni hefur verið spáð langlífi, en mun tíminn einn leiða í ljós hvort það gengur eftir, en ég er að minnsta kosti full bjartsýni.


mbl.is Ný ríkisstjórn tekur við völdum
Tilkynna um óviðeigandi tengingu við frétt

Siglfirðing í samgöngumálin

428898A

Já merkilegt með þessa Siglfirðinga, þeir eru alls staðar, eins og maðurinn sagði um árið "Siglfirðingum fækkar ekkert þeir búa bara annars staðar." Ég hef stundum sagt að það hafi verið pólitík í kalda vatninu því á Laugarveginum, þessari litlu götu bjuggu auk mín, Kristján L. Möller, Sigríður Anna Þórðardóttir, Birkir jón Jónsson og Illugi Gunnarsson.

Ég var nokkuð viss um að Kristján Lúðvík Möller yrði ráðherra, en var ekki alveg búin að gera það upp við mig hvaða ráðuneyti hann fengi. En samgönguráðuneytið varð það og afhenti Sturla Böðvarsson honum lyklavöldin í dag. Hann Kristján er líka ráðherra sveitarstjórnamála eftir breytingar, en flytjast sveitarstjórnamálin þangað frá félagsmálaráðuneytinu. Hann hefur góða reynslu af sveitarstjórnarmálum sem mun nýtast honum vel í nýja starfinu.


mbl.is Kristján: Samgönguráðuneytið skriðþungt skip
Tilkynna um óviðeigandi tengingu við frétt

Tóm hamingja

525_stefania%20um%20rikisstjorn

Ég hlustaði á þau Geir H. Haarde, formann Sjálfstæðisflokksins og Ingibjörgu Sólrúnu Gísladóttur, formann Samfylkingarinnar, kynna stefnuyfirlýsingu nýrrar ríkisstjórnar í dag.

Ég verð að segja að ég er mjög sátt við það sem ég heyrði þar og fékk staðfestingu á því sem ég nefndi á bloggi mínu í gær með velferðarstjórnina. Ég er ekki hissa á því vegna áherslna beggja flokka fyrir kosningar og því enginn ágreiningur þar. Ég var líka mjög ánægð með að halda á áfram að lækka skatta á einstaklinga og fyrirtæki og jafnframt taka á stimpilgjöldunum og afnema þau á kjörtímabilinu, taka á tekjutengingum og óbeinum sköttum og aukin aðstoð við einstaklinga og fjölskyldur sem hafa lágar tekjur. Guðlaugur Þór fær verðug verkefni ný rekstrarform, og kostnaðargreiningu á heilbrigðisþjónunni og þónokkrar jákvæðar breytingar þar sýnist mér. Evrópumálin voru afgreidd snyrtilega og verður haldið áfram að leggja áherslu á EES og því að fylgjast með þróun mála í álfunni. Ekkert að því í sjálfu sér. Ég er líka ánægð með innflytjendamálin sem og þá miklu áherslu sem lögð er á umhverfismál, rannsóknir og menntamál og þótti mér afar vænt um þegar talað var um áframhaldandi, en ekki eins og ónefndir flokkar töluðu í kosningabaráttunni eins og verið væri að hefja þessa stórsókn núna, enda höfum við verið að vinna að öllum þessum málaflokkum af krafti á liðnum árum.

Þegar á heildina er litið er ég mjög ánægð með þessa stefnuyfirlýsingu og lít bjartsýn fram á veginn og sé ekki annað en framundan séu bjartir tímar fyrir okkur Íslendinga.

,,Stefnuyfirlýsing ríkisstjórnar - Sjálfstæðisflokks og Samfylkingar 2007

Ríkisstjórn Sjálfstæðisflokks og Samfylkingar endurspeglar sögulegt samstarf tveggja stærstu stjórnmálaflokka landsins. Þessir flokkar hafa einsett sér að mynda frjálslynda umbótastjórn um kraftmikið efnahagslíf, öfluga velferðarþjónustu, bættan hag heimilanna og aukna samkeppnishæfni atvinnulífsins. Ríkisstjórnin mun áfram kappkosta að virkja kraftinn í menningarlífi landsmanna því að menning er í senn vaxandi atvinnugrein, aflvaki nýsköpunar og mikilvægur hluti af sjálfsmynd þjóðarinnar. Ríkisstjórnin leggur áherslu á að jafnrétti í reynd verði leiðarljós í allri stefnumótun hennar og stefnir að því að skapa jöfn tækifæri allra landsmanna, óháð kyni, búsetu, uppruna og félagslegri stöðu. Árangur og hagsæld undanfarinna ára hefur skapað tækifæri til enn frekari framfara og Ísland á að vera áfram í fararbroddi þeirra þjóða sem búa við best lífskjör. Málefni yngstu og elstu kynslóðanna eru forgangsmál ríkisstjórnarinnar og hún mun leggja áherslu á að auka jöfnuð með því að bæta kjör þeirra hópa sem standa höllum fæti. Hún mun vinna að víðtækri sátt í samfélaginu um aðgerðir á sviði efnahags- og félagsmála, um náttúruvernd og auðlindanýtingu og stöðu Íslands í samfélagi þjóðanna. Ríkisstjórnin mun leitast við að eiga gott samstarf við alla flokka á Alþingi og standa vörð um sjálfstæði Alþingis og eftirlitshlutverk þess.

Traust og ábyrg efnahagsstjórn

Kraftmikið efnahagslíf er forsenda þess að hægt sé að halda áfram uppbyggingu í menntamálum, samgöngumálum og í heilbrigðis- og félagsmálum. Eitt brýnasta verkefni nýrrar ríkisstjórnar er að tryggja stöðugleika í efnahagslífinu í þágu heimila og atvinnulífs. Markmið hagstjórnarinnar er að tryggja lága verðbólgu, lágt vaxtastig, betra jafnvægi í utanríkisviðskiptum, jafnan og öflugan hagvöxt og áframhaldandi trausta stöðu ríkissjóðs. Stórframkvæmdir, skattkerfisbreytingar og aðrar hagstjórnaraðgerðir verða tímasettar í ljósi þessara markmiða. Tryggja verður að íslensk fyrirtæki búi við bestu samkeppnis- og rekstrarskilyrði sem völ er á. Mikilvægt er að rekstrarumhverfi íslenskra fyrirtækja tryggi vöxt þeirra og laði að starfsemi erlendis frá. Settur verði á laggirnar samráðsvettvangur milli ríkisins, aðila vinnumarkaðarins og sveitarfélaga um aðgerðir og langtímamarkmið á sviði efnahags-, atvinnu- og félagsmála.

Kraftmikið atvinnulíf

Íslenskt atvinnulíf mun einkennast í sívaxandi mæli af þekkingarsköpun og útrás. Samstarf atvinnulífsins og íslensku háskólanna er lykill að bættum árangri og nýsköpun í atvinnurekstri. Ríkisstjórnin mun styðja menningu og listir sem mikilvægan hluta af aðdráttarafli landsins og vaxandi uppsprettu útflutningstekna. Íslensk fyrirtæki eru í harðnandi samkeppni við erlend fyrirtæki, bæði heima og heiman, og á næstu árum mun hugvit og tækni- og verkþekking ráða úrslitum um velgengni íslenskra fyrirtækja. Ríkisstjórnin vill skapa kjörskilyrði fyrir áframhaldandi vöxt, útflutning og útrás íslenskra fyrirtækja, m.a. með aðgerðum til að efla hátækniiðnað og starfsumhverfi sprotafyrirtækja, svo sem með eflingu Rannsóknasjóðs og Tækniþróunarsjóðs. Í umbreytingu íslensks atvinnulífs á undanförnum árum felst meðal annars aukið vægi ýmiss konar alþjóðlegrar þjónustustarfsemi, þar á meðal fjármálaþjónustu. Ríkisstjórnin stefnir að því að tryggja að slík starfsemi geti áfram vaxið hér á landi og sótt inn á ný svið í samkeppni við önnur markaðssvæði og að útrásarfyrirtæki sjái sér áfram hag í að hafa höfuðstöðvar á Íslandi. Áhersla verður lögð á að efla Fjármálaeftirlitið til þess að íslenski fjármálamarkaðurinn njóti fyllsta trausts. Tímabært er að leysa úr læðingi krafta einkaframtaksins svo að íslensk sérþekking og hugvit fái notið sín til fulls í útrás orkufyrirtækja. Mikilvægt er að heilbrigð samkeppni og eðlileg verðmyndun þrífist á öllum sviðum atvinnulífsins og að neytendur njóti góðs af þeirri samkeppni. Efla skal samkeppniseftirlit í því skyni. Ríkisstjórnin leggur áherslu á mikilvægi öflugs landbúnaðar og hágæðaframleiðslu á matvælum í landinu. Unnið verði að endurskoðun landbúnaðarkerfisins með það fyrir augum að auka frelsi, bæta stöðu bænda og lækka verð til neytenda. Tryggja skal stöðugleika í sjávarútvegi. Gerð verður sérstök athugun á reynslunni af aflamarkskerfinu við stjórn fiskveiða og áhrifum þess á þróun byggða. 

Hvetjandi skattaumhverfi

Stefnt skal að frekari lækkun skatta á einstaklinga á kjörtímabilinu, meðal annars með hækkun persónuafsláttar. Ríkisstjórnin mun vinna að endurskoðun á skattkerfi og almannatryggingum til að bæta hag lágtekjufólks og millitekjufólks. Fyrirtæki skulu búa við stöðugt og örvandi skattaumhverfi. Á kjörtímabilinu verður leitað leiða til að lækka frekar skatta á fyrirtæki. Þá skal stefnt að því að umhverfisþættir fái aukið vægi í skattastefnunni. Kerfi óbeinna skatta, s.s. vörugjalda og virðisaukaskatts, verði endurskoðað. Stimpilgjald í fasteignaviðskiptum verði afnumið á kjörtímabilinu þegar aðstæður á fasteignamarkaði leyfa.

Markviss ríkisrekstur

Unnið verði að einföldun og nútímavæðingu stjórnsýslunnar, aukinni notkun á upplýsingatækni til að bæta opinbera þjónustu, auka skilvirkni og einfalda samskipti milli almennings og stjórnvalda. Verkaskipting ráðuneyta verði endurskipulögð og ráðherrum, alþingismönnum og stjórnsýslu ríkisins settar siðareglur. Eftirlaunakjör alþingismanna og ráðherra verði endurskoðuð og meira samræmi komið á í lífeyrismálum ráðamanna og almennings. Ríkisstjórnin leggur áherslu á að ýtrasta aðhalds sé gætt í rekstri hins opinbera þannig að fjármunir skattgreiðenda séu nýttir sem best. Ráðdeild og varfærni í fjármálum hins opinbera er höfuðnauðsyn og áríðandi að hlutur opinberrar starfsemi af þjóðarframleiðslunni vaxi ekki umfram það sem nú er. Gera skal rammafjárlög til fjögurra ára í senn. Þar verði sett fram meginstefna í hagstjórn, viðmið um tekjuöflun og útgjöld ríkissjóðs. Jafnframt verði þjónustuverkefnum og framkvæmdum ríkisins forgangsraðað. Tekju- og verkaskipting ríkis og sveitarfélaga verði endurskoðuð með það að markmiði að efla sveitarstjórnarstigið.

Barnvænt samfélag

Ríkisstjórnin mun beita sér fyrir markvissum aðgerðum í þágu barna og barnafjölskyldna á Íslandi. Í því skyni verði mótuð heildstæð aðgerðaáætlun í málefnum barna og ungmenna er byggist meðal annars á rétti þeirra eins og hann er skilgreindur í barnasáttmála Sameinuðu þjóðanna. Tannvernd barna verði bætt með gjaldfrjálsu eftirliti, forvarnaraðgerðum og auknum niðurgreiðslum á tannviðgerðum barna. Barnabætur verði hækkaðar til þeirra sem hafa lágar tekjur og nemendur í framhaldsskólum fái stuðning til kaupa á námsgögnum. Sérstaklega verði hugað að stuðningi við börn innflytjenda í skólakerfinu. Jafnframt verði aukinn stuðningur við langveik börn, börn með hegðunarvandamál, geðraskanir og þroskafrávik. Þegar í stað verði gripið til aðgerða til að vinna á biðlistum á því sviði. Hugað verði að foreldraráðgjöf og -fræðslu. Forvarnastarf gegn kynferðislegu ofbeldi verði eflt og stuðningur við fjölskyldur ungmenna, sem eiga í vanda vegna vímuefnaneyslu, aukinn. Fæðingarorlofið verði lengt í áföngum.

Bættur hagur aldraðra og öryrkja

Ríkisstjórnin leggur áherslu á að styrkja stöðu aldraðra og öryrkja. Unnið verði að einföldun almannatryggingarkerfisins. Samspil skatta, tryggingabóta, greiðslna úr lífeyrissjóðum og atvinnutekna einstaklinga verði skoðað sérstaklega til að tryggja meiri sanngirni og hvetja til tekjuöflunar og sparnaðar. Hraðað verði uppbyggingu 400 hjúkrunarrýma fyrir aldraða og einbýlum fjölgað. Sólarhringsþjónusta verði efld og einstaklingsmiðuð þjónusta aukin. Dregið verði úr tekjutengingum og skerðingum bóta í almannatryggingakerfinu. Stefnt verði að hækkun frítekjumarks vegna atvinnutekna fyrir aldurshópinn 67-70 ára. Tekjutenging launatekna 70 ára og eldri við lífeyri almannatrygginga verði að fullu afnumin sem og skerðing tryggingarbóta vegna tekna maka. Skoðað verði hvort undanskilja megi hluta af lífeyrissjóðstekjum eldri borgara skerðingum í almannatryggingakerfinu. Jafnframt skal stefnt að því að ríkissjóður tryggi ellilífeyrisþegum lífeyri að lágmarki 25 þúsund krónur á mánuði frá lífeyrissjóði. Almennt skerðingarhlutfall í almannatryggingakerfinu lækki í 35%. Fylgt verði eftir tillögum örorkumatsnefndar um stóraukna starfsendurhæfingu og nýtt matskerfi varðandi örorku og starfsgetu. Jafnframt verði komið til móts við þann hóp sem er með varanlega skerta starfsgetu. Stefnt verði að því að færa ábyrgð á lögbundinni þjónustu við aldraða og fatlaða frá ríki til sveitarfélaga.

Jafnrétti í reynd

Gerð verði áætlun um að minnka óútskýrðan kynbundinn launamun hjá ríkinu og stefnt að því að hann minnki um helming fyrir lok kjörtímabilsins. Ríkisstjórnin vill koma á samvinnu aðila vinnumarkaðarins og hins opinbera um að leita leiða til að eyða þessum launamun á almennum vinnumarkaði. Endurmeta ber sérstaklega kjör kvenna hjá hinu opinbera, einkum þeirra stétta þar sem konur eru í miklum meirihluta. Stefnt skal að því að jafna stöðu kvenna og karla í nefndum og stjórnunarstöðum á vegum ríkisins. Tryggður verði réttur launafólks til að skýra frá launakjörum sínum ef það svo kýs. Trúfélögum verði veitt heimild til að staðfesta samvist samkynhneigðra.

Menntakerfi í fremstu röð

Ríkisstjórnin setur sér það markmið að allt menntakerfi þjóðarinnar, frá leikskóla til háskóla, verði í fremstu röð í heiminum. Framfarir og hagvöxtur komandi ára verða knúin áfram af menntun, vísindum og rannsóknum. Ríkisstjórnin mun beita sér fyrir áframhaldandi fjárfestingu í rannsóknum og menntakerfi þjóðarinnar. Áhersla verður lögð á gæði, sveigjanleika og fjölbreytni í námsframboði þannig að allir geti fundið nám við sitt hæfi. Fjölgað verður námsleiðum og áhersla aukin á valfrelsi nemenda og einstaklingsmiðað nám, meðal annars til að draga úr brottfalli nemenda á framhaldsskólaaldri. Efla skal list- og verkmenntun á öllum skólastigum og auka náms- og starfsráðgjöf. Lögð verður áhersla á að skapa ný tækifæri til náms fyrir þá sem hafa eingöngu lokið grunnskólaprófi og efla fullorðinsfræðslu innan skólakerfis og á vinnumarkaði. Stefnt skal að auknu faglegu og rekstrarlegu sjálfstæði skóla og minni miðstýringu. Unnið verði að lengingu og aukinni fjölbreytni í kennaranámi. Lög um Lánasjóð íslenskra námsmanna verði endurskoðuð með það að markmiði að bæta kjör námsmanna enn frekar.

Örugg heilbrigðisþjónusta og vímuefnavarnir

Stefna ríkisstjórnarinnar er að á Íslandi sé veitt heilbrigðisþjónusta á heimsmælikvarða. Leggja á stóraukna áherslu á forvarnir á öllum sviðum og stuðla að heilbrigðari lífsháttum. Leita á leiða til að lækka lyfjaverð og einfalda greiðsluþátttöku hins opinbera. Kostnaðargreina á heilbrigðisþjónustuna og taka upp blandaða fjármögnun á heilbrigðisstofnunum þar sem fjármagn fylgir sjúklingum. Þannig fái heilbrigðisstofnanir fjármagn í samræmi við þörf og fjölda verka. Skapað verði svigrúm til fjölbreytilegri rekstrarforma í heilbrigðisþjónustu, m.a. með útboðum og þjónustusamningum, en jafnframt tryggt að allir hafi að henni jafnan aðgang, óháð efnahag. Nauðsynlegt er að bregðast hart við aukinni vímuefnavá með öflugri fræðslu og forvörnum, stuðningi við fjölskyldur í vanda, fjölbreyttum meðferðarúrræðum og hertri löggæslu. Ríkisstjórnin leggur sérstaklega áherslu á að meðferðarúrræði séu nægjanleg fyrir þá sem ánetjast vímuefnum og tryggt sé að þjónusta á þessu sviði sé samþætt og markviss og gagnist öllum hópum sem á þurfa að halda. Fylgja þarf eftir áætlunum um uppbyggingu fangelsa.

Landið verði eitt búsetu- og atvinnusvæði

Stefna skal að því að allir landsmenn eigi greiðan aðgang að menntun, atvinnu og þjónustu óháð búsetu og fái notið sambærilegra lífskjara. Skilgreind verði þau störf á vegum ríkisins sem hægt er að vinna án tillits til staðsetningar og þannig stuðlað að fjölgun starfa á landsbyggðinni. Í rammafjárlögum fyrir næstu fjögur ár verði lögð mikil áhersla á eflingu innviða samfélagsins á sviði samgangna og fjarskipta. Úrbætur í samgöngum eru lykilatriði til að stuðla að jafnvægi í byggð landsins og lækka flutningskostnað. Styttri vegalengdir milli byggðakjarna og öruggari vegir skapa möguleika á stærri og lífvænlegri atvinnu- og búsetusvæðum. Ráðist verði í stórátak í samgöngumálum og aukin áhersla lögð á umferðaröryggi og almenningssamgöngur. Ríkisstjórnin mun beita sér sérstaklega fyrir úrbótum á samgöngukerfi höfuðborgarsvæðisins. Tryggja ber að landsmenn hafi allir færi til að nýta sér þá byltingu sem orðin er í gagnaflutningum. Ríkisstjórnin vill tryggja öryggi í gagnaflutningum til og frá landinu með nýjum sæstreng og sömuleiðis að flutningshraði gagna aukist í takt við þá þróun sem á sér stað. Góð gagnasamskipti auka mjög aðgengi að menntun og þjónustu, óháð landfræðilegri staðsetningu, og fela auk þess í sér tækifæri til nýsköpunar.

Í sátt við umhverfið

Ríkisstjórnin einsetur sér að Ísland verði í fararbroddi þjóða heims í umhverfismálum. Íslensk stjórnvöld, fyrirtæki og menntastofnanir eru í einstakri stöðu til þess að láta til sín taka á alþjóðavettvangi í baráttu gegn mengun og sóun náttúruauðlinda. Ríkisstjórnin stefnir að því að ná víðtækri sátt um verndun verðmætra náttúrusvæða landsins og gera skýra áætlun um samdrátt í losun gróðurhúsalofttegunda. Ríkisstjórnin hyggst efla skógrækt og landgræðslu meðal annars í þeim tilgangi að binda kolefni í andrúmsloftinu. Einnig verði skipulega unnið að aukinni notkun vistvænna ökutækja, m.a. með því að beita hagrænum hvötum. Til að skapa sátt um vernd og nýtingu náttúrusvæða er mikilvægt að ljúka rannsóknum á verndargildi þeirra og gildi annarrar nýtingar. Sérstök áhersla verði lögð á að meta verndargildi háhitasvæða landsins og flokka þau með tilliti til verndar og orkunýtingar. Stefnt verður að því að ljúka vinnu við rammaáætlun fyrir lok árs 2009 og leggja niðurstöðuna fyrir Alþingi til formlegrar afgreiðslu. Þar til sú niðurstaða er fengin verði ekki farið inn á óröskuð svæði án samþykkis Alþingis, nema rannsóknar- eða nýtingarleyfi liggi fyrir. Nokkur svæði, sem talin eru mikilvæg út frá verndunarsjónarmiðum af stofnunum umhverfisráðuneytisins, verði undanskilin nýtingu og jarðrask þar óheimilt þar til framtíðarflokkun hefur farið fram í samræmi við staðfestar niðurstöður hinnar endurskoðuðu rammaáætlunar. Slík svæði eru Askja, Brennisteinsfjöll, Hveravellir, Kerlingafjöll, Kverkfjöll og Torfajökull. Vatnasviði Jökulsár á Fjöllum verði bætt við Vatnajökulsþjóðgarðinn og tryggt að ekki verði snert við Langasjó í virkjanaskyni. Stækkun friðlandsins í Þjórsárverum verði tryggð þannig að það nái yfir hið sérstaka votlendi veranna.

Umbætur í innflytjendamálum

Mikilvægt er að stjórnvöld, atvinnulífið og samfélagið allt taki saman höndum við að berjast gegn fordómum gagnvart minnihlutahópum, hvort sem þeir fordómar byggjast á uppruna eða öðrum þáttum. Unnin verði heildstæð framkvæmdaáætlun í málefnum innflytjenda sem hafi það markmið að betur verði tekið á móti erlendu fólki sem flyst til landsins og því auðveldað að verða virkir þátttakendur í íslensku samfélagi og rækta menningu sína. Tryggt verði að útlendingar á vinnumarkaði njóti sambærilega réttinda og íslenskt launafólk og að allar ráðningar erlends verkafólks séu í samræmi við gildandi kjarasamninga. Komið verði í veg fyrir félagsleg undirboð á vinnumarkaði. Átak verði gert í íslenskukennslu fyrir útlendinga.

Frumkvæði í alþjóðamálum

Mannréttindi, aukin þróunarsamvinna og áhersla á friðsamlega úrlausn deilumála verða nýir hornsteinar í íslenskri utanríkisstefnu. Ný ríkisstjórn harmar stríðsreksturinn í Írak og vill leggja sín lóð á vogarskálar friðar í Írak og Miðausturlöndum, m.a. með þátttöku í mannúðar- og uppbyggingarstarfi. Íslendingar eiga að stefna að því að taka forystu í baráttunni gegn mengun hafsins og alþjóðlegu starfi til að bregðast við loftslagsbreytingum. Að öðru leyti byggist stefna ríkisstjórnarinnar í utanríkismálum á þeim gildum sem legið hafa til grundvallar samvinnu vestrænna lýðræðisríkja, norrænu samstarfi og viðleitni þjóða heims til að auka frelsi í alþjóðlegum viðskiptum. Ríkisstjórnin mun fylgja markaðri stefnu í öryggis- og varnarmálum og koma á fót samráðsvettvangi stjórnmálaflokkanna um öryggismál. Ríkisstjórnin leggur áherslu á að allar meiriháttar ákvarðanir um utanríkismál verði teknar í samráði við utanríkismálanefnd Alþingis.

Opinská umræða um Evrópumál

Ríki Evrópusambandsins eru mikilvægasta markaðssvæði Íslands. Samningurinn um Evrópska efnahagssvæðið (EES) hefur reynst þjóðinni vel og hann er ein af grunnstoðum öflugs efnahagslífs þjóðarinnar. Skýrsla Evrópunefndar verði grundvöllur nánari athugunar á því hvernig hagsmunum Íslendinga verði í framtíðinni best borgið gagnvart Evrópusambandinu. Komið verði á fót föstum samráðsvettvangi stjórnmálaflokka á Alþingi sem fylgist með þróun mála í Evrópu og leggi mat á breytingar út frá hagsmunum Íslendinga. Nefndin hafi samráð við innlenda sérfræðinga og hagsmunaaðila eftir þörfum.

Endurskoðun stjórnarskrár

Haldið verður áfram endurskoðun á stjórnarskrá lýðveldisins. Áhersla verður lögð á að leiða til lykta ágreining um þjóðareign á náttúruauðlindum í ljósi niðurstöðu sérnefndar um stjórnarskrármál um það atriði á síðasta þingi."  

 


mbl.is „Vonast til að ný stjórn leiði erfið deilumál til lykta"
Tilkynna um óviðeigandi tengingu við frétt

Glæsilegt

Guðlaugur Þór heilbrigðisráðherra

Guðlaugur Þór Þórðarson verður heilbrigðisráðherra í nýrri Þingvallastjórn. Ég átti alveg eins von á því að það yrðu fleiri nýir ráðherrar í röðum Sjálfstæðismanna, en svo kom á daginn að hann verður eini nýi ráðherrann og verður falið að stýra ráðuneyti sem Sjálfstæðismenn hafa mikið rætt um að undaförnu að mikilvægt sé að fá að stýra.

Það er ljóst er að hann þarf að taka til hendinni í heilbrigðiskerfinu og er ég sannfærð um að nýja heilbrigðisráðherranum muni farast það starf vel úr hendi á komandi árum.


mbl.is Guðlaugur Þór: Hlakka til að takast á við verkefnið
Tilkynna um óviðeigandi tengingu við frétt

Sátt

428665A

Þá er biðin á enda og ljóst hverjir sitja í ríkisstjórn Sjálfstæðisflokks og Samfylkingar.

Geir H. Haarde, forsætisráðherra

Þorgerður Katrín Gunnarsdóttir, menntamálaráðherra
Árni M. Mathiesen, fjármálaráðherra
Björn Bjarnason, dómsmálaráðherra
Einar Kristinn Guðfinnsson, landbúnaðar- og sjávarútvegsráðherra
Guðlaugur Þór Þórðarson, heilbrigðisráðherra

Ég verð að segja að ég er mjög sátt við þetta val á ráðherrum og hrókeringu verkefna milli ráðuneyta. Ég átti aldrei von á því að það yrðu fleiri konur í ríkisstjórninni en Þorgerður Katrín Gunnarsdóttir, varaformaður Sjálfstæðisflokksins. Hún verður áfram menntamálaráðherra eins og ég var að vona og Árni M. Mathiesen fjármálaráðherra, sem kom mér skemmtilega á óvart, en hann vann flottan kosningasigur í Suðurkjördæminu. Nýr í ráðherraembætti er Guðlaugur Þór heilbrigðisráðherra og er ánægjulegt að Sjálfstæðismenn hafa nú fengið það ráðuneyti í sinn hlut eftir allt of langan tíma og er ég viss um að hann á eftir að standa sig vel sem heilbrigðisráðherra. Björn Bjarnason verður áfram dómsmálaráðherra og veit ég að það verða ekki fáir sem gleðjast með mér yfir því. Einar K. Guðfinnsson verður ráðherra nýs ráðuneytis landbúnaðar og sjávarútvegs sem verða sameinuð enda löngu tímabær breyting og var mikið rætt um slíka breytingu í kosningabaráttunni. Sturla Böðvarsson verður forseti Alþingis og Arnbjörg Sveinsdóttir mun áfram gegna embætti þingflokksformanns.

En þá að ráðherrum Samfylkingarinnar. Ingibjörg Sólrún Gísladóttir, formaður Samfylkingarinnar verður utanríkisráðherra og ekkert sem kom á óvart þar, en Ágúst Ólafur Ágústsson varaformaður mun stýra innra starfi flokksins eins og Ingibjörg orðaði það í viðtali í kvöld. Kristján Lúðvík Möller, Siglfirðingur verður samgönguráðherra og var verið að grínast með það í kvöld að nú yrðu Héðinsfjarðargöngin tvöfölduð, Össur Skarphéðinsson iðnaðarráðherra, Þórunn Sveinbjarnardóttir umhverfisráðherra, Björgvin G. Sigurðsson verður viðskiptaráðherra og Jóhanna Sigurðardóttir  kvenskörungur og kona sem ég ber mikla virðingu fyrir verður félagsmálaráðherra og má því svo sannarlega segja að hennar tími sé nú loksins kominn.

Nú er bara að bíða eftir stjórnarsáttmálanum. Hann verður án efa velferðarmiðaður, enda þau mál á oddinum í kosningabaráttu beggja flokka og hæpið að um verði að ræða neina árekstra þar. En spennandi verður að vita hvernig tekið verður á Evrópumálum, sem og virkjunum og fleiri málum sem ljóst er að flokkarnir verða að semja um. En þetta kemur allt í ljós á morgun og lítið annað að gera en að bíða.




mbl.is Þrjár konur og þrír karlar ráðherrar fyrir Samfylkingu
Tilkynna um óviðeigandi tengingu við frétt

Veðurfræðingar ljúga

nt_chancesnowpartlycloudy

Við Íslendingar erum mikil veðuráhugaþjóð og ég ekkert undanskilin í því sambandi. Þegar ég tala við foreldra mína á Siglufirði þá spyr ég þau alltaf um veðrið, nema náttúrulega þegar það er bongóblíða á Sigló og pabbi verður fyrri til að hringja í mig. Pabbi er mjög veðurglöggur maður og var yfir 40 ár til sjós og þar lengst af sem skipstjóri og líkt og með aðra sjómenn þurfti hann að stóla á sig sjálfan líkt og aðrir sjómenn í gegnum aldirnar. Ég hef gaman að velta veðrinu fyrir mér og er óhætt að segja að einhæfni sé ekki orðið þegar rætt er um veður á Íslandi.

Ég hef oft rætt um veðuráhuga Íslendinga á ráðstefnum erlendis og eru erlendir samstarfsmenn undrandi yfir öllum þessum áhuga og aðgengilegum upplýsingum. Þegar ég fer síðan að ræða allar náttúruhamfarirnar sem við getum átt von á hérna á Íslandi nær fólk því ekki hvernig okkur dettur yfir höfuð í hug að búa hérna á þessu landi elds og ísa. 

Þegar ég bjó í Ameríku þá komst ég að því mér til mikillar undrunar að þar hafði fólk ekki áhuga á veðrinu og var slétt sama um veðurspár og þótti allt þetta tal um veður og framtíðarspár algjör tímaeyðsla, það væri hvort eð er ekkert hægt að breyta veðrinu. Hér á Íslandi aftur á móti er veðrið málið og ef við ætlum í útilegu þá leitum við bara uppi hagstæðustu veðurspána og öfugt ef við nennum ekki og syngjum svo bara hástöfum með Bogomil Font lagið "Veðurfræðingar ljúga" og látum sem ekkert sé. Við kippum okkkur heldur ekki upp við svona snjókomu eins núna 21. maí, getum við ekki bara litið á þetta sem svona smá túristavetur líkt og með Heklugosin.

 


mbl.is Esjan komin í hvítan kufl að nýju
Tilkynna um óviðeigandi tengingu við frétt

Samkvæmisleikurinn, hver verður ráðherra?

428471A

Ég get ekki neitað því að hugurinn hefur oft leitað til Þingvalla undanfarna daga. Ég verð líka að viðurkenna að ég er ekki alveg búin að venjast þessari mynd af þeim Geir og Ingibjörgu Sólrúnu, en það gerist örugglega með tímanum.

Samkvæmisleikurinn, hver verðu ráðherra? er mikið spilaður þessa dagana. Litið er til efstu manna í kjördæmum, þeirra sem hlutu góða kosningu, landsbyggðarsjónarmiða, en að mínu mati er alveg ljóst að ekki verður kynjahlutfallið jafnt í Þingvallarstjórninni. Ég sá eina færslu þar sem búið var að taka saman atkvæðamagn að baki þingmanna og ef við lítum 10 efstu hjá Sjálfstæðisflokknum þá er staðan þessi (þessir feitletruðu eru fyrstu þingmenn sinna kjördæma):

  • 1. Þorgerður Katrín Gunnarsdóttir 19.307 Suðvestur
  • 2. Geir H. Haarde 13.841 Reykjavík Suður
  • 3. Guðlaugur Þór Þórðarson 12.760 Reykjavík Norður
  • 4. Bjarni Benediktsson9.654 Suðvestur
  • 5. Árni M. Mathiesen 9.120 Suður
  • 6. Björn Bjarnason 6.921 Reykjavík Suður
  • 7. Kristján Þór Júlíusson 6.522 Norðaustur
  • 8. Ármann Kr. Ólafsson 6.436 Suðvestur
  • 9. Guðfinna S. Bjarnadóttir 6.380 Reykjavík Norður
  • 10. Sturla Böðvarsson5.199 Norðvestur

Hér er sami listi fyrir Samfylkinguna og eru þessir feitletruðu oddvitar sinna kjördæma.

  1. Gunnar Svavarsson (S)12.845 Suðvestur
  2. Össur Skarphéðinsson (S)10.248 Reykjavík Norður
  3. Ingibjörg Sólrún Gísladóttir (S)10.233 Reykjavík Suður
  4. Björgvin G. Sigurðsson (S) 6.783 Suður
  5. Katrín Júlíusdóttir (S) 6.423
  6. Jóhanna Sigurðardóttir (S) 5.124
  7. Ágúst Ólafur Ágústsson (S) 5.117
  8. Kristján L. Möller (S) 4.840 Norðaustur
  9. Þórunn Sveinbjarnardóttir (S) 4.282
  10. Guðbjartur Hannesson (S) 3.793 Norðvestur

Hvernig lítur ykkar drauma Þingvallastjórn út?


mbl.is Fundur stendur enn yfir á Þingvöllum
Tilkynna um óviðeigandi tengingu við frétt

Reykfylltu bakherbergin

428471A

Spennandi dagur, Uppstigningardagurinn 2007, hugsanlega ný ríkisstjórn Sjálfstæðisflokks og Samfylkingar í burðarliðnum.

Það var stórmerkilegt að horfa á Kastljósið áðan. Ingibjörg var ísköld í stöðunni og komst vel frá sínu og ræddi m.a. um að ekki hefði komið til greina fyrir Vinstri græn að mynda ríkisstjórn með Framsókn. Það var svo staðfest í viðtalinu við þá Steingrím J. og Guðna Ágústsson, en þegar þeir fóru að ræða stöðuna var ýmislegt sem kom fram. Steingrímur vildi senda Framsókn í endurhæfingu, en var tilbúinn að hleypa þeim svo um borð í ríkisstjórnina þegar þeir væri búnir að ná sér. Þeir Steingrímur og Guðni vildu báðir gefa eftir forsætisráðherraembættið til ISG. Mikið var rætt um baktjaldamakk Samfylkingar og Sjálfstæðisflokks og Guðni talaði um trúnaðarbrest milli stjórnarflokkanna og Baugsríkið. En trúlega hafa ekki verið haldin nein kaffiboð hjá Kaffibandalaginu nýlega fyrst Ingibjörg Sólrún sagðist hafa heyrt það í fyrsta skipti frá Steingrími J. Sigfússyni, formanni VG, í fjölmiðlum nú síðdegis að hann teldi að Samfylkingin ætti að fá umboð til að mynda vinstristjórn. 


mbl.is Ingibjörg Sólrún: VG vildi ekki mynda stjórn með Framsóknarflokki
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband