Bumbubolti .....fyrir börn

Ég hélt að bumbubolti væri bara fyrir miðaldra karla þangað til ég rakst á þetta á heimasíðu Ártúnsskóla.

"Bumbubolti" er ný íþrótt sem byggir á hröðum leik með boltum sem eru þaktir "frönskum rennilás" og eiga að fá festu á sérstökum vestum sem nemendur klæðast.

Ja há!... þar kom að því. Ég var svo sem alveg búin að átta mig á því fyrir löngu að þessi íþróttagrein væri INN, en þetta kom mér samt á óvart.

Hann Elli minn er meðlimur í einu ágætu félagi sem nefnist UMFUS og stendur fyrir ungmennafélag ungra stráka. Hjá þeim er haldin heimsmeistarakeppni hvern einasta laugardag. Ég fer með lilluna í íþróttaskólann, eða Sollu skólann eins og hún vill kalla á meðan pabbi ferð að keppa í bumbuboltanum, sem er kannski rangnefni þar sem strákarnir í Karlaþrekinu hjá honum Ella í Toppformi eru bara nokkuð slank og flottir. En svo koma þeir út eftir eins og hálftíma hlaup og átök.....sveittir og eldrauðir í framan, stundum haltir, en yfirleitt brosandi, því þetta er greinilega gott fyrir sálina.

UMFUS keppir líka á pollamótinu á Akureyri, við hina "ungu" strákana, sem búnir eru að æfa "til að vera með" ....right..... ég er nú fyri löngu búin að sjá að það er til þess að slá í gegn og ná sér nú í verðlaunasæti. Síðasta sumar náðu þeir ekki að komast á verðlaunapall. En þetta árið á nú að sýna tuddunum í Atlavík og öllum hinum hvernig á að spila fótbolta. Í fyrra var nokkuð um meiðsli hjá pollunum, ég held að meira en helmingur hafi slasast. 3 rifbeinsbrot (Atlavík ), tognanir og skaðar á hnjám og lærum...spurning hvort það hafi eitthvað með skriðþungan að gera...

Utan átakanna er svo ungmennafélagsandinn efldur og fáum við kerlingarnar líka að vera með. Árshátíð árlega, ungir (<40)  keppa við gamla og konur hvetja sína til dáða á hliðarlínunni. Dómnefnd UMFUS útnefnir, tudda ársins, efnilegasta nýliðann og svo náttúrulega íþróttamann UMFUS og man ég eftir atviki þar sem einn félaginn kom í teitið beint af slysó, á hækjum eftir heimsmeistarakeppni dagsins.   

Ég er svo sannarlega ánægð með að nú skuli vera farið að æfa grunnskólakrakka fyrir þessi átök sem bíða þeirra á fullorðinsárunum og spurning hvort ekki væri ráð að bæta við sjálfsvarnaríþrótt líka.              

Athugasemdir

[Vilborg Traustadóttir, 28.3.2007 kl. 11:48]

Barnabörnunum mínum finnst best að kúra á ört minnkandi "ömmubumbu"!!!

[Ásdís Sigurðardóttir, 29.3.2007 kl. 02:10]

Heyrðu, þekkirðu nokkuð Ellu frænku?? hún er sjálfstæðskona, býr í Asparhvarfi, gift Inga sínum og á 3 dætur. ??? sorry forvitnina.

[Herdís Sigurjónsdóttir, 29.3.2007 kl. 08:32]

Asparteigi er það ekki?  En hitt passar allt svo vel að ég er viss um að þú ert að tala um hana Elínu Karítas sem ég þekki mjög vel og er listakona hjá okkur í Mosó, eins og við köllum þá sem voru á framboðslistanum okkar.