Er þú páskabarn?

 

Ég er með ákveðið spurningaþema í gangi þessa vikuna, bara svona fyrir þá sem ekki hafa tekið eftir því  . Í dag þá ákvað ég að velta fyrir mér páskunum. Ég mun líka blogga annað slagið um persónuleg málefni á þessari síðu, en hingað til hef ég haft aðra síðu fyrir fjölskyldubloggið og myndirnar, en ætla að láta mér nægja þessa síðu a.m.k. yfir páskana.

En aftur að páskunum. Ég sjálf nýt þessa tíma í botn og í mínum huga er þetta mikill fjölskyldutími. Við fjölskyldan leggjum vanalega land undir fót og skellum okkur á æskuslóðir mínar Siglufjörð og förum á skíði. Þetta árið þá fóru stóru krakkarnir á undan okkur og eru þau búin að vera í dekri hjá ömmu og afa frá því á föstudag. Við förum svo á eftir með lilluna og höfum lánað húsið okkar á meðan þannig að ekki þurfum við að hafa áhyggjur af því, enda svo sem með öryggiskerfi líka, allt til að komast hjá innbrotum.

Þessi tími er alltaf skemmtilegur í leikskólunum, alls konar páskaföndur og höfum við fengið a.m.k. eitt listaverk á dag frá þeirri stuttu undanfarna daga. Hún hefur samt látið okkur fá listaverkin með fyrirvara um að við látum ömmu og afa fá þau þegar við förum á Sigló og tökum páskaeggin með líka.  Ekki mættu lifandi páskaungar í leikskólann þetta árið, en kannski er það ekki gert lengur í leikskólum, en stóru krökkunum þótti þetta alltaf mikið fjör á sínum tíma. 

Margir sem ég þekki hafa farið til útlanda þetta árið og tóku flestir sér tveggja vikna frí. Maður veltir því fyrir sér hvort væri sniðugt að tengja vetrarfrí við páskafríið og taka tvær heilar vikur, en eins og málin eru í dag er allur gangur á vetrarfríum grunnskólanna. Við lögðum til í fræðslunefnd um daginn að kannað yrði hvort grundvöllur væri fyrir því að samræma vetrarfrí grunnskólanna á svæðinu. Þá væri mögulega hægt að hafa eitt vetrarfrístímabil fyrir jól og annað eftir jól. Með því væri hægt að skapa grundvöll fyrir námskeiðshaldara varðandi námskeið fyrir krakkana og fjölskuldur og ferðaskrifstofur til að bjóða upp á ferðir á þeim tíma sem það væri í gangi. Þá yrði meira út þessum tíma fyrir fjölskylduna. En að mínu mati held ég það sé allt í lagið að kanna hug skólafólks og foreldra til þessa og kanna kosti og galla.

Páskaeggin eru ómissandi á páskum og erum við alltaf með páskaeggjaleit að morgni páskadags. Það er sko hamagangur á Hóli þegar krakkarnir eru að leita. Það hefur reyndar eftir því sem krakkarnir eldast verið erfiðara fyrir mig A týpuna að vaka til að fela blessuð eggin. Ég man eftir að eitt árið þá settum við stórt páskaegg út í glugga og síðan þegar það loksins fannst þá hafði það lekið niður í sólinni og unginn kominn niður í fót...en svoleiðis mistök gerir maður bara einu sinni .

Ég ætla ekki að fjalla um boðskap páskanna frekar en Spaugstofan, en er hins vegar alveg staðráðin í því að njóta páskafrísins með fjölskyldunni og fá mér páskaegg líka.

Athugasemdir

[Jóhanna Fríða Dalkvist, 4.4.2007 kl. 17:27]

Ég man eftir því sem krakki að mér fannst rosalega gaman að leita, gerði það stundum viljandi að ef ég fann egg að þá þóttist ég ekki finna það og hélt áfram að leita og leyfði hinum að finna það sem ég hafði fundið, þannig gat ég leitað lengur

Held það væri erfitt að fela núna fyrir mér þar sem ég bý í frekar lítilli íbúð en eggið sem ég fékk sent til mín á sunnudaginn er RIIIIIISAEGG ,  tæplega eitt og hálft kíló takk fyrir  

[Karl Tómasson (IP-tala skráð) 4.4.2007 kl. 20:44]

Hæ Herdís mín. Hvað er þetta með konur og súkkulað? Ég er sammála þér, eltingaleikurinn og spenningurinn við leitina að páskaegginu á páskadagsmorgun er spennandi og skemmtilegur. Ég fíla þennan sið. Ég reyndar hef gaman að svona hefðum sem festast í sessi.

 Bestu kveðjur frá Kalla Tomm.

[Vilborg Traustadóttir, 4.4.2007 kl. 20:49]

Ég faldi eitt sinn páskaeggið hans Trausta míns bak viuð gardínu í búrinu heima á Sauðanesi.  Ekki fyrir neinn ratleik. Aðallega svo það yrði ekki etið fyrir páska. Það var nr 10. Þegar við sóttum það á páskadagsmorgun var það bráðið niður í pokanum.  Það hafði komið sól.......Síðan hef ég ekki falið eggin.

[Guðmundur H. Bragason, 4.4.2007 kl. 22:56]

Ég held ég sé ungabarn. Kanski páskaungabarn

[Herdís Sigurjónsdóttir, 5.4.2007 kl. 09:31]

 Nú er ég komin í snjókomuna á Sigló....alveg dásamlegt sveitaloft, alveg eins og í Mosó.

Gummi ég held að Elli sé líka páskaungabarn og kannski Kalli líka......

[Ásdís Sigurðardóttir, 5.4.2007 kl. 20:45]

Er þetta lenska í Mosó að láta leita að páskaeggjunum? ég var einu sinni á Reykjalundi og þá vorum við látin leita út um alla móa af eggjum, ég og eggjavinur minn fundum flest og fengum stór í verðlaun, svo börnin mín voru voða glöð þegar mamma kom í páskafrí með fullt af eggjum.  Takk fyrir góðar kveðjur til  mín og bóndans já og góða skemmtun á Sigló   verður ekki sól um helgina?