Sægrænir fingur suður með sjó

Stóra systir mín hún Kristín og Doddi mágur fengu verðlaun fyrir flottasta nýja garðinn í Grindavík þetta árið og er ég ekki hissa á því.

Þau eru búin að byggja og bæta og gróðursetja út í eitt. Setja upp flaggstöng svo hægt sé að flagga Liverpool fánanum á gróðri stundu, svona í stíl við bílnúmerið og planið. Doddi er búinn að koma mér verulega á óvart í þessum framkvæmdum, það er eins og hann stýrimaðurinn hafi bara dottið í smiðsgírinn með smá dassi af rafvirkja. Hann er búinn að setja upp hvert grindverkið af fætur öðru, smíða blómabeð og kassa og segja gárungarnir að hann sé kominn með sægræna fingur. Síðan hafa þau hjónakornin líka verið iðin við að gróðursetja alls konar blóm og tré og er meiriháttar hvað garðurinn er orðinn flottur. Það er líka gaman að sjá hvað hægt er að byggja upp svona flottan og garð á stuttum tíma.

Well it runs in the family og setur það enga smá pressu á mig. Mamma og pabbi hafa í tvígang fengið garðaverðlaun, nei annars pabbi fékk fyrri verðlaunin einn, en það er ekkert að marka því það var á þeim árum sem hann var alltaf úti á sjó  og mamma var öllum stundum í garðinum. En slíkt gerist örugglega ekki í dag þó húsbóndinn sé skráður fyrir húsinu. Ég held að við Elli séum samt kannski fallin á tíma með að fá verðlaun fyrir nýjan garð...  en kannski eru 7 ár ekki svo langur tími . En um að gera að setja sér háleit markið og um að gera að stefna að því að fá garðaverðlaun á næstu 5 árum.

Athugasemdir

[Vilborg Traustadóttir, 7.9.2007 kl. 13:18]

Þetta er æðislegt hjá þeim....