Flokkun, jarðgerð, gasgerð, brennsla og minni urðun

Ég var búin að skrifa heillanga færslu um vinnuferð sem stjórn Sorpu fór með sorpsamlögum á Suðurlandi, Suðurnesjum og Vesturlandi til að skoða þær leiðir sem talið var að við gætum farið í þeim málum. Færslan hvarf þegar ég ætlaði að setja inn mynd og því ætla ég bara að skrifa stuttu útgáfuna núna og bæta svo öllum fræðunum við seinna.

Þessi ferð var vel skipulögð og þétt og náðum við að skoða jarðgerð, gasgerð, flokkunarstöðvar, tvær brennslustöðvar og flokkunarstöð þar sem íbúar nota litaða poka fyrir lífrænan heimilisúrgang sem svo er flokkaður frá í flokkunarstöðinni. Ég taldi mig nú þekkja þetta ágætlega og var í vafa hvort ég ætti að fara með vegna skólans. Þegar heim er komið er ég enn að melta allan fróðleikinn og sé ekki eftir því núna að hafa farið með þar sem margt kom mér á óvart og annað sem mér þótti flókið og ómögulegt reyndist einfaldara þegar maður sá það með berum augum og fékk tækifæri til að ræða við heimamenn. Það sem kom mér samt mest á óvart voru brennslustöðvarnar. Þær voru staðsettar í miðju íbúahverfi. Glæsilegar byggingar og þegar inn var komið var allt hreint og fínt. 

Ekki var verra að í för voru skemmtilegir ferðafélagar og þegar við fengum þessa flottu bláu hjálma í einum staðnum þótti okkur við hæfi að taka þessa fínu sjálfstæðismynd.

Athugasemdir

[Ásdís Sigurðardóttir, 2.11.2007 kl. 14:18]

Kannski við sjálfstæðismenn förum bara að ganga með svona bláa hjálma dags daglega. Gaman annars að heyra af þér.  Þetta er greinilega bæði puð og stuð.  Þú verður bara a skrifa langar færslur í word svo ekkert týnist.  Hafðu það sem allra best mín kæra. Kveðja til ykkar, þín vink. Ásdis

[Karl Tómasson, 3.11.2007 kl. 19:11]

Sjálfstæðismenn þurfa ekki að ganga með hjálma í Mosó, þar er allt með ró og spekt kæra Ásdís, hahahaha.

Bestu kveðjur frá Kalla Tomm úr Kvosinni.

[Vilborg Traustadóttir, 5.11.2007 kl. 00:51]

Sjálfstæðismenn setja alltaf "öryggið á oddinn".........

[Vilborg Traustadóttir, 9.11.2007 kl. 13:48]

......og hvenær ferðu þú svo í jólafrí og færð tíma í bloggið svo við dyggir lesendur þínir getum snúið okkur að lestirnum????