Vinabæjamót í Mosfellsbænum

Á miðvikudagskvöldinu fórum við fjölskyldan upp í Kjarna til að taka á móti gestunum okkar, þeim Kjerlaugu Rasmussen og Henny Hedelund frá Thisted, sem er vinabær okkar í Danmörku.

Vinabæjamótið var svo sett formlega á fimmtudagsmorguninn og ætlaði ég að vera með í lýðheilsuhópnum, en sökum óvæntra verkefna sem tengjast meistaraverkefni mínu var ég heima að vinna, en mætti af og til í hádegisverðina, hátíðarkvöldverðinn í Hlégarði og svo náttúrulega slúttið í gær. Nú eru þær stöllur í skoðunarferð í Borgarfirði og fara svo heim í bítið á morgun.

Eftir að búið var að slíta mótinu í gær í yndislegu veðri á nýja torginu okkar fórum við með þær Kjerlaugu og Henny til Grindavíkur en við áttum pantað borð á Salthúsinu. Við skoðuðum myndir af saltfiskverkun og sjómennsku og hittum Kristínu systur, Dodda, Ragga, Rögnu og Co og súperkokkinn Þórð.

Við fengum okkur fisk og krakkarnir hamborgara. Við stelpurnar vorum allar sammála um að þetta væri sá allra besti steinbítur sem við hefðum fengið um ævina og var Elli meira en sáttur við humarinn. Hann Þórður er fábær kokkur og verður gaman að fylgjast með honum í framtíðinni þessari elsku. 

Eftir að við stelpurnar höfðum fengið okkur kaffi og koníak fórum við út og hittum Sjóarann síkáta fyrir utan Salthúsið. Við reyndum að vekja henn, en hann lét okkur sko ekki trufla sig svo við tókum bara mynd af Henny með honum og létum hann vera.

Við keyrðum heim í miðnætursól og yndislegu veðri, alsæl og ánægð með vel heppnað kvöld í Grindavík.