ÞÚ GETUR

Þetta eru frábær fréttir og ljós í öllu krepputalinu. Ég hitti Ólaf Þór um daginn og sagði hann mér frá hugmyndinni sem hann hefur nú látið verða að veruleika. Hann er með flott fólk með sér og er ég sannfærð um að sjóðurinn ÞÚ GETUR á eftir að breyta lífi fjölmargra einstaklinga til góðs. Markmið sjóðsins eru göfugt, að styrkja einstaklinga til náms sem átt hafa við geðræn veikindi að stríða, að efla nýsköpun og bætta þjónustu við geðsjúka á sviði fræðslu og forvarna. Ekki veitir nú heldur af að stuðla að jákvæðri umræðu og aðgerðum sem draga úr fordómum í samfélaginu, sem vissulega eru töluverðir.

Þunglyndi er ótrúlega algengur sjúkdómur hér á landi sem veldur mikilli vanlíðan hjá þeim veiku með tilheyrandi álagi á aðstandendur.  Stundum er um að ræða veikindi eins og fæðingarþunglyndi eða þunglyndi tengt álagi eða áfalli og getur fólk þá náð sér að fullu með meðferð eins og ef um einhvern annan sjúkdóm væri að ræða, en samt er fólk oft litið hornauga, sem er merkilegt í sjálfu sér. Þetta verður til að fólk segir ekki frá veikindum sínum því það er hrætt við stimpilinn. Að vísu sýnist mér umræðan vera að verða opnari og mögulega eru fordómarnir að minnka, en betur má ef duga skal.  

Til hamingju Ólafur Þór og hjartanlega til hamingju með afmælið.

Þú getur!

Athugasemdir

[Ásdís Sigurðardóttir, 28.10.2008 kl. 22:03]

Sæl kæra hálfnafna. Nú er ég komin á stjá á ný, verð duglegri með degi hverjum.  Virkilega þarft framtak sem þú bloggar hér um.  Kær kveðja til þín og þinna. þín Ásdís

[Vilborg Traustadóttir, 29.10.2008 kl. 16:06]

Sammála og flott framtak! Kær kveðja í næsta bæjarfélag!