Ættfræðiáhugi

Ættfræði er eitt af mínum áhugamálum, en ég hef svo sem ekki mikinn tíma sem stendur, en minn tími mun koma.

Ég hef gaman að því að leita heimilda um forfeður mína og svo koma heilu ættirnar í leitirnar, bara ef maður opnar augun. Herdísarnafnið hefur hjálpað mér, en það eru margar Herdísar í pabbaætt, ætt galdramanna af Ströndum. Ég spjallaði við einn frænda minn á Andlitsskinnunni áðan, hann Pétur Jóns og sagði hann mér að handverkshúsið Kört í Trékyllisvík hefði fengið 400 þúsund króna styrk úr Þjóðhátíðarsjóði til að setja upp sýningu um æfi og störf Þorsteins Þorleifssonar í Kjörvogi, sem var langalangafi minn. Við spjölluðum um að nú ættum við að nýta tækifærið og koma halda ærlegt ættarmót á Ströndunum. Halli frændi Gísa á Akureyri og Pétur voru búnir að tala um að gera eitthvað og bauð ég mér alveg sjálf í undirbúningsnefndina. það er ljóst að eitthvað verður gert í þessu á nýja árinu.

Annar leggur var hristur saman nýverið. En við Stefanía María frænka mín Pétursdóttir tókum okkur til og buðum í frænkuboð í Salthúsinu hjá Kristínu systur í Grindavík. Það var okkar fyrsta frænkumót, en klárlega ekki síðasta og kemur mamma næst. Við stefnum að því að halda frænkumót í Hrísey í sumar, en við frænkur eigum eftir að plana það betur. Planið er að fara einn laugardag út í Hrísey, fara og skoða Ystabæ og verja deginum í góðum félagsskap og treysta böndin.

Hver veit nema árið 2009 verði bara ár ættarmótanna.

Athugasemdir

[Ásdís Sigurðardóttir, 21.12.2008 kl. 23:13]

Kær kveðja á þig og þína

[Herdís Sigurjónsdóttir, 21.12.2008 kl. 23:50]

Já Anna, en þegar það er Herdís + Þorsteinn eru töluverðar líkur á því að viðkomandi sé tengdur galdramönnum af Ströndum .

Takk hálfnafna, sömuleiðis .

[Halli Gísla (IP-tala skráð) 22.12.2008 kl. 10:23]

Sæl frænka. Það verður í nægu að snúast hjá okkur ef við ætlum að sinna afkomendum Þorsteins og Herdísar í Kjörvogi, en þeir voru a.m.k. 932 í maí, þegar ég lauk við niðjatal ömmu og afa á Brunngili. A.m.k. 10 hafa bæst við síðan. Ég þarf að drífa í að láta prenta Viðvaning Þorsteins og koma honum út fyrir sýningu og niðjamót. Ævisaga Þorsteins verður ekki tilbúin til útgáfu fyrir sumarið, nema ég fái því meiri aðstoð. Á að mestu leyti eftir að ræða við eldri Árneshreppsbúa og við afkomendur, sem hugsanlega hafa heyrt sögur um Þorstein eða eiga muni eftir hann.

[Valgerður M. Jóhannsdóttir (IP-tala skráð) 23.12.2008 kl. 22:07]

Bara að skilja eftir smá spor svona rétt fyrir jólin. Gleðileg jól til ykkar allra og vonandi hafið þið það sem allra best.

Við Gummi eru nú á leið á miðnæturtónleika í Dalvíkurkirkju með Matta Matt (úr Pöpum) og Eyþóri Inga (sá sem vann hjá Bubba)og vonumst eftir smá jólastemmingu hjá þeim.

Jólakveðjur frá Dalvík , Valgerður og coþ