Endurreisnarnefnd Sjálfstæðisflokksins

Við Elli fórum á fund í Valhöll í gær þar sem starf Endurreisnarnefndar Sjálfstæðisflokksins var kynnt og ný heimasíða opnuð.

Endurreisnarnefndin starfar í fjórum hópum:

• uppgjör og lærdómur
• hagvöxtur framtíðarinnar
• atvinnulíf og fjölskyldur
• samkeppnishæfni

Endurreisnarnefndin hefur verið starfandi sl. þrjár vikur og hefur hún það hlutverk að móta tillögur og hugmyndir fyrir Sjálfstæðisflokkinn í því endurreisnarstarfi sem er framundan í okkar samfélagi. Mér lýst vel á Endurreisnarnefndina og ætlum við hjón að taka virkan þátt í starfinu fram að landsfundi í lok mánaðarins.

Það var ekki verra að hitta marga góða félaga í Valhöll og snérist var umræðan eftir fundinn eðlilega um prófkjör kjördæmanna sem eru framundan.

Á endurreisnarvefnum getur fólk komið með athugasemdir og hugmyndir um það hvernig best er að standa að endurreisninni og er ekki krafist flokksskírteinis.

Framtíðin

Utanríkisiðnaður

Nú er rétti tíminn til að draga saman seglin í utanríkisiðnaði Íslalandsins bláa og fækka sendiráðum. Það gæti svo sem verið hugsandi að fá horn á sendiráðum frænda okkar eða fara í samstarf með rekstur sendiráðsskrifstofa, en sendiráðum verður að fækka. 

Vill fjölga norrænum sendiráðum

Hugleiðingar um nýliðun á Alþingi

Nú sit ég hér í meistaravertíðar"þynnkunni", les vefmiðla og velti fyrir mér stöðu mála í pólitíkinni. 

Framundan eru alþingiskosningar og liggur í loftinu hávær krafa um nýliðun á Alþingi, krafa um að: 

• skipta öllum út
• losna við flokkseigendafélögin
• útrýma sjálfstæðisflokknum
• ráða alls ópólitíska ráðherra, sem eru óháðir sérfræðingar og fagmenn..
• fá konur til forystu
• fá að velja einstaklinga til starfa

En ég velti því nú fyrir mér hvernig staðan yrði ef öllum 63 alþingismönnum yrði skipt út og ráðherrar yrðu ópólitískir. Fyrir það fyrsta yrði lítið um framkvæmdir ef allir kæmu óreyndir inn og yrðu að setja sig inn í málin frá grunni. Kerfið er nefnilega ekki einfalt, fjölmargar nefndir og ráð og eins veit ég það ósköp vel eftir setu mína í sveitarstjórn að reynsla manna og þekking á sögu mála er ómetanleg. Slíkt yrði náttúrulega úr sögunni með Nýja-Alþingi. Vissulega hafa starfsmenn stofnana einnig góða innsýn og þekkingu, en kannski kemur krafa um að skipta þeim út líka, hver veit! 

Annars get ég ekki séð að þetta verði raunin. Sú leið sem notuð er hér á Íslandi til að velja á lista er uppstilling eða prófkjör og prófkjör er klárlega sú leið sem farin verður árið 2009. Ekki er að sjá að um mikla endurnýjun verði að ræða miðað við þá sem þegar hafa boðað þátttöku sína í prófkjörum, enda hafa þeir sem nú þegar eru starfandi töluvert forskot á nýliðana, svo ekki sé talað um nýja flokka.

Sjálfstæðisflokkurinn frestaði landsfundi sínum fram til loka mars. Samfylkingin tók ákvörðun um að halda landsfund sinn sömu helgi og Sjálfstæðisflokkurinn og Vinstri græn ætla að funda í mars. Krafa samfélagsins er að við fundarslit komi Nýja-X? en slíkt er náttúrulega bara hlægilegt að mínu mati. að halda að það að skipta um mynd í "skírteininu" leysi flokka undan ábyrgð á því sem gert hefur verið á liðnum árum. 

Kannski átti endurnýjunarkrafan bara við gömlu ríkisstjórnina, já eða bara helming hennar, sjálfstæðisflokkinn. Ætlar Nýja-ríkisstjórnin kannski öll að fara frá núna og hleypa nýju fólki að? I don't think so. 

En ég er sannfærð um að nýtt fólk á eftir að láta til sín taka, en ég verð afskaplega undrandi ef um mikla nýliðun verður að ræða.  

Kjörsókn var góð árið 2007 eða 83,6% og spennandi að vita hver niðurstaðan verður 25. apríl 2009.

Framsóknarflokkurinn		21.349	11,72	7
Sjálfstæðisflokkurinn		66.749	36,64	25
Frjálslyndi flokkurinn		13.233	7,26	4
Íslandshreyfingin		5.953	3,27	0
Samfylkingin		48.742	26,76	18
Vinstrihreyfingin - grænt framboð		26.136	14,35	9
Gild atkvæði		182.162	100	63
Auð og ógild atkvæði		2909
Samtals greidd atkvæði		185.071

Prófkjör um miðjan mars

Ég ætla að bjóða mig fram til setu í miðstjórn Sjálfstæðisflokksins

 

Ég er búin að taka ákvörðun um að bjóða mig fram til setu í miðstjórn Sjálfstæðisflokksins á næsta landsfundi. Á síðasta landsfundi velti ég þessu fyrir mér og ákvað að bjóða mig fram næst. Svo var landsfundinum flýtt eins og flestir muna og þá gaf ég þetta upp á bátinn því ég var á kafi í meistararitgerðarskrifum. En í lok febrúar verð ég orðin meistari í umhverfis- og auðlindafræðum og því ekkert að vanbúnaðir að láta reyna á miðstjórnarkosninguna í lok mars.

Ástæða þess að ég ætla að bjóða mig fram er vel ígrunduð og tel ég mig hafa ýmislegt fram að færa og ekki síst á þessum uppbyggingartímum sem eru framundan. Ég hef bæði góða reynslu af starfi í félagasamtökum, hef mikinn áhuga og þekkingu á ferlum og skipulagningu, hef góða menntun og er m.a. sérfræðingur í áfallastjórnun og endurreisn og síðast en ekki síst er ég mikil sjálfstæðiskona sem er tilbúin að leggja töluvert á mig til að endurskipuleggja og efla flokkinn minn.

Þegar ég hef nefnt þetta við fólk á undanförnum dögum segja flestir. Já en ætlar þú ekki bara að fara á Alþingi? ..... og finnst mér alltaf jafn merkilegt hvernig fólk horfir á pólitíska framabraut. Fyrst þátttaka í félagi ungra, svo þátttaka í nefndarstörfum, þátttaka í sveitarstjórn og efsta stig er seta á Alþingi og loks ráðherradómur. En ég lít ekki svo á. Það er vissulega göfugt að vera á Alþingi, ég er ekki að draga úr því en í mínum huga er ég nákvæmlega að sinna því sem ég hef mestan áhuga á sveitarstjórnarstiginu. Að skipuleggja nærþjónustu við íbúana og starfa fyrir bæjarfélagið mitt Mosfellsbæ. Það hef ég gert í rúm tíu ár og er alltaf að takast á við ný ögrandi verkefni með góðu samstarfsfólki bæði kjörnum fulltrúum og starfsmönnum.

En varðandi þingmennskuna er ég svo sem alin upp réttum megin Laugarvegarins á Siglufirði og ætti þar að leiðandi að eiga hafa möguleika á þingmennsku, ef litið er til allra þeirra þingmanna sem hafa búið Austan megin götunnar. En ég hef ekki séð Alþingisljósið ennþá.

Núna langar mig hins vegar til að vera virkari í flokksstarfinu. Ég vil leggja mitt af mörkum til að styrkja innra starf flokksins og tel að seta í miðstjórn sé rétti vettvangurinn. Ekki það að konur skorti í miðstjórn, en af ellefu miðstjórnarfulltrúum sem kosnir voru á síðasta landsfundi voru átta öflugar konur og því töluvert hærra hlutfall af estrógeni en testósteróni í þeim hópi, en þegar fastafulltrúarnir eru taldir með hafa karlar nú samt ennþá vinninginn.

Myndin sem fylgir er tekin af Sjálfstæðismönnum í Mosfellsbæ á síðasta landsfundi.

Öld testósterónsins lokið

Meistaraprófsfyrirlestur - Hlutverk sveitarstjórna eftir náttúruhamfarir og önnur samfélagsleg áföll

Hlutverk sveitarstjórna eftir náttúruhamfarir og önnur samfélagsleg áföll
Greining á verkaskiptingu ríkis og sveitarfélaga í skipulagi almannavarna.

Fyrirlestur Herdísar Sigurjónsdóttur til meistaraprófs í umhverfis- og auðlindafræðum

Sveitarfélögin gegna lykil hlutverki í samfélaginu og sinna stórum hluta opinberrar þjónustu við íbúana. Eftir hamfarir eins og jarðskjálfta eða snjóflóð bregst kerfi almannavarna við og fjöldi ólíkra viðbragðsaðila starfar á áfallasvæðinu. Leit og björgun og aðhlynning slasaðra hafa forgang. Meðan hjálparlið er að störfum á slysavettvangi, sinnir sveitarfélagið margs konar þjónustu  við þolendur s.s. hreinsun og viðgerðum, húsnæðisaðstoð og annarri félagslegri aðstoð og ráðgjöf, eftir eðli áfallsins.

Þessi rannsókn beindist að stjórnsýslu sveitarfélaga og viðbrögðum vegna náttúruhamfara og annarra samfélagsáfalla. Gerð var almenn lagagreining á hlutverki ríkis, sveitarfélaga og annarra lykilviðbragðsaðila í skipulagi almannavarna. Jafnframt voru verkferlar og viðbragðsáætlanir skoðaðar og fléttaðar saman við hið raunverulega hlutverk sem greining hefur sýnt að sveitarfélög gegni eftir hamfarir. Höfundur kom að aðstoð við sveitarfélög á Suðurlandi eftir jarðskjálftana 29. maí 2008 og  nýttist sú reynsla  í verkefninu. Aðferðum verkefnisstjórnar og gæðastjórnunar var beitt við alla þætti verkefnisins og notaði höfundur m.a.hugkort við greiningu  og framsetningu niðurstaðna.

Lagagreiningin var jafnframt hluti af rannsóknarverkefninu „Langtímaviðbrögð við náttúruhamförum (LVN)". Lokaafurð þess verkefnisins voru leiðbeiningar fyrir starfsmenn sveitarfélaga um viðbrögð í kjölfar náttúruhamfara, sem þagar hafa verið nýttar af sveitarfélögum á Suðurlandi.

Niðurstaðan sýnir að starfsemi sveitarfélaga er í raun ekki hluti af skipulagi almannavarna, nema hvað almannavarnanefndir varðar. Almannavarnanefndir eru skipaðar af sveitarstjórnum og eru eru lögum samkvæmt ábyrgar fyrir gerð viðbragðsáætlana, sem fyrst og fremst lúta að stjórnun og samhæfingu við leit og björgun á fólki og allra fyrstu viðbrögðum. Þær áætlanir ná ekki til starfsemi sveitarfélaga og nærþjónustu sem þau veita þolendum eftir náttúruhamfarir og önnur áföll.

Meistaraverkefnið hefur hlotið góðar undirtektir sveitarstjórna, Sambands íslenskra sveitarfélaga, almannavarnadeildar ríkislögreglustjóra, forsætisráðuneytis og dómsmálaráðuneytis. Það gefur vísbendingu um að fullur áhugi sé meðal aðila um að bæta viðbragðskerfið og tryggja þátttöku sveitastjórna í stefnumótun málaflokksins og bæta raunverulegu hlutverki sveitarfélaga við skipulag almannavarna. 

Leiðbeinendur:
Guðrún Pétursdóttir framkvæmdastjóri stofnunar Sæmundar Fróða
Gunnar Stefánsson prófessor í iðnaðarverkfræði
Páll Jensson prófessor í iðnaðarverkfræði 

Fyrirlesturinn er opinn öllum

Staðsetning viðburðar: Askja Nánari staðsetning: stofa 132