Það er af sem áður var

Haustið 1989 útskrifaðist ég úr háskóla og fór að vinna á Keldum og þótti heppin. En um áramótin 1991 - 1992 útskrifaðist maðurinn minn svo úr byggingartæknifræði og þá var hvergi vinnu að fá fyrir nýútskrifaða byggingatæknifræðinga. Við ungu hjónin hringdum á allar verkfræðistofur og líka í flest bæjarfélög á landinu til að leita að vinnu, en án árangurs og fór hann því í smíðavinnu og fékk svo að lokum vinnu hjá tryggingafélagi. Á þessum tíma þá var mjög mikið atvinnuleysi og flutti stór hópur háskólamenntaðra einstaklinga úr landi, en nú er öldin heldur önnur fyrir verk- og tæknifræðinga. 

Hér er ein forsíðufrétt frá þeim tíma sem ég vil helst gleyma eða frá tímum síðustu vinstri stjórnar. Í þessari forsíðufrétt Morgunblaðsins frá 8. júní 1989 greinir þá verandi fjármálaráðherra frá efnahagsaðgerðum ríkisstjórnarinnar. 

Í fréttinni segir m.a:

ÓLAFUR Ragnar Grímsson fjármálaráðherra mun í dag leggja fyrir ríkisstjórnina tillögur um það hvernig rétta megi af fyrirsjáanlegan 3,5 milljarða halla á ríkissjóði á árinu. Hann segist munu leggja fram tillögur um aukna skattheimtu, niðurskurð og auknar lántökur innanlands. Hins vegar verði forðast að taka erlend lán til þess að rétta af hallann.

Ástæðan fyrir þessum halla er sú að á undanförnum vikum hafa verið teknar ákvarðanir um ýmis viðbótarútgjöld og ýmsir aðrir hlutir verið að koma í ljós,“ sagði Ólafur Ragnar í samtali við Morgunblaðið.

Undanfarin ár hefur verið næg atvinna í landinu og er ánægjulegt til þess að hugsa að hér er stór hópur ungs fólks sem ekki þekkir atvinnuleysi. Tekist hefur að lækka skatta, greiða niður skuldir ríkissjóðs og auka framlög til velferðarkerfisins. Ég vona svo sannarlega að börnin mín þurfi aldrei að upplifa svona tíma eins og við foreldrarnir. Lausnin sem í fréttinni er kynnt er lýsandi fyrir vinstri stjórn til að takast á við hallarekstur, aukin skattheimta - niðurskurður -  auknar lántökur - þessar aðferðir heyra til allrar hamingju fortíðinni til. 

Nei alveg rétt, ég var bara búin að steingleyma því. Núna á að bjarga öllu með hagvextinum sem virðist eiga að haldast, bara af því bara.

Athugasemdir

[Ágúst Dalkvist, 8.5.2007 kl. 00:27]

Eitt af því versta sem maður hefur lent í er að vera atvinnulaus verðandi pabbi. Ætla svo sannarlega að krossa við D á laugardaginn til að forða börnum mínum frá því að prófa það.

[Vilborg Traustadóttir, 8.5.2007 kl. 13:21]

Fékk lánan hluta úr þessari færslu máli mínu til stuðnings á mínu bloggi.  Þetta er auðvitað blákakdur veruleikinn.  Fólk er bara búið að gleyma eða það var varla fætt þegar vinstri menn stjórnuðu.  (Óstjórnuðu).

[Karl Tómasson, 8.5.2007 kl. 22:40]

Elsku Herdís mín þetta er nú meiri sjálfstæðissíðan getur þú ekki reynt að gera þessu góða fólki grein fyrir fjörinu í Mosó.???

Þar ægir saman furðufólki með misjafnar skoðanir og allt er í blóma.

Mig langar bara að benda þér og þínum gestum á það að ég Vinstri græni Karlinn í Mosó hef ekki stimplað mig í vinnu í 20 ár. Ég hef alltaf fundið upp á einhverjum skrattanum til að gera. Laun mín hef ég aldrei getað reytt mig á, þau hafa aldrei verið fastur punktur í minni tilveru. Ég hef bara reitt mig á sjálfan mig. Er það ekki eitthvað fyrir þig og þína. Allt hefur þetta einhvernveginn gengið upp hjá mér og mínum og við höfum það bara ágætt og á köflum skrambi gott.

Notum hausinn, ekki kálhausinn!!! og því síður álhausinn!!!

Kær kveðja frá Kalla Tomm úr Kvosinni heimsfrægu!!!

[Herdís Sigurjónsdóttir, 9.5.2007 kl. 09:26]

Kalli minn ertu ekki bara í röngum flokki eftir allt saman?