Frábær fundur með FAMOS

Ég fór ásamt bæjarráði Mosfellsbæjar á fund FAMOS, samtaka aldraðra í Mosfellsbæ. Þetta var bráðskemmtilegur fundur og spunnust fjörugar umræður um ýmis hagsmunamál eldri borgara og þó mest um hjúkrunarheimilið, heildstæða öldrunarþjónustu og aðstöðu fyrir félagsstarfið, sem skiptir þennan hóp mjög miklu máli. Á fundinum var stofnaður var vinnuhópur FAMOS og Mosfellsbæjar til að skoða húsnæðismálin. Hópurinn mun starfa undir stjórn Jóhönnu B. Magnúsdóttur formanni fjölskyldunefndar, sem hún mun klárlega stjórna af röggsemi ef ég þekki hana rétt.

Það er dýrmætt fyrir okkur að hafa hagsmunafélag eins og FAMOS í bæjarfélaginu, sem gætir hagsmuna þessa hóps aldraðra sem fer ört vaxandi í þjóðfélaginu. Með því ávinnst margt og hefur stjórnin oft átt fundi með bæjaryfirvöldum vegna ýmissa mála er þau varða. Það var ekki annað að heyra á fundarmönnum en þeir væri bara nokkuð ánægðir með það sem gert hefur verið og eins það sem framundan er. En eðlilega er ýmislegt sem betur má fara og komu fram margar gagnlega ábendingar á fundinum. 

Eftir framsögur okkar, Jóhönnu B, Marteins og Hönnu og góðar umræður um bæjarmálin var gert kaffihlé og fengum við kaffi og Með'í með stóru M-i og mun ég ekki gleyma rjómapönnsunum í bráð. Eftir kaffið var slegið á létta strengi með gamanmáli og vísum og fór ég heim ríkari en þegar ég kom.

Þegar ég kom heim gat ég ekki annað en skellt upp úr þegar ég fór að hugsa til þess að þegar ég verð orðin 67 (og þá vonandi komin í stjórn FAMOS með Kalla Tomm og Halla) og get sagt " já sko ég hef verið í félaginu frá stofnun þess, fyrir 27 árum", en þá var ég formaður fjölskyldunefndar og fékk tækifæri til að sitja stofnfundinn.

  

Hann Grétar Snær var svo elskulegur að senda mér nokkrar myndir af fundinum til að skreyta færsluna og læt ég þær fylgja með og sérstaklega var ég ánægð með myndir af mér og strákunum þeim Þorbirni og Hans.

 

Athugasemdir

[Ásdís Sigurðardóttir, 23.1.2008 kl. 00:24]

Hefði alveg viljað vera með þér í kvöldþ Þið eruð svo krúttelg.

[Linda Ósk Sigurðardóttir (IP-tala skráð) 29.1.2008 kl. 23:15]

Flott mynd af þér og henni Hönnu okkar